នាព្រឹកថ្ងៃសុក្រ ទី៨ ខែកក្កដា ឆ្នាំ២០២២ ឯកឧត្តម ឡោក ឆាយ អគ្គលេខាធិការរងព្រឹទ្ធសភា បានអញ្ជើញជាអធិបតីភាពក្នុងពិធីបិទវគ្គបណ្តុះបណ្តាលស្តីពី នវានុវត្តន៍ក្នុងរដ្ឋបាលសាធារណៈ នៅសាលសិក្ខាសាលាបណ្ណាល័យព្រឹទ្ធសភា។ វគ្គបណ្តុះបណ្តាលស្តីពី នវានុវត្តន៍ក្នុងរដ្ឋបាលសាធារណៈនេះ រៀបចំឡើងដើម្បីផ្តល់ឱកាសសម្រាប់មន្ត្រីរាជការនៃអគ្គលេខាធិការដ្ឋានព្រឹទ្ធសភា ដើម្បីបានសិក្សាឈ្វេងយល់ចំណេះបន្ថែមអំពីនវានុវត្តន៍ និងអាចបំពេញការងារប្រចាំថ្ងៃឱ្យបានកាន់តែល្អប្រសើរថែមទៀតជូនសា្ថប័ន។ វគ្គនេះផ្ដោតសំខាន់លើ៖ ១.ទស្សនទាននៃការបង្កើតចំណេះដឹង។ ២.សញ្ញាណទូទៅនៃនវានុវត្តន៍។ ៣.នវានុវត្តន៍ក្នុងវិស័យសាធារណៈ។ ៤.ការអនុវត្ត និងធ្វើការងារក្រុមលើប្រធានបទនវានុវត្តន៍។ វគ្គបណ្តុះបណ្តាលនេះ ឧទ្ទេសនាមដោយ លោក ស្រ៊ាង ផានិត ប្រធាននាយកដ្ឋានបណ្តុះបណ្តាលបន្តនៃសាលាភូមិន្ទរដ្ឋបាល ដែលសិក្សារៀងរាល់ព្រឹក មានរយៈពេល៥ថ្ងៃ ចាប់ពីថ្ងៃទី០៤ ដល់ថ្ងៃទី០៨ ខែកក្កដា ឆ្នាំ២០២២ មានសិក្ខាកាមជាថ្នាក់ដឹកនាំមកពីគ្រប់អង្គភាពចំណុះអគ្គលេខាធិការដ្ឋានព្រឹទ្ធសភា ចូលរួមសរុបចំនួន៣៧នាក់។
ប្រភព៖នាយកដ្ឋានព័ត៌មាន
